Այսօր արցախյան ազատամարտի 500 մահապարտներից մեկի` Աղասի Կարապետյանի ծննդյան օրն է: Թեեւ օրը հիշարժան է նաեւ մայրության եւ գեղեցկության տոնի առիթով, սակայն Աղասի Կարապետյանի եւ նրա 77-ամյա մայրիկի` Խանում Կարապետյանի համար այս օրը այլ ընթացք է ստացել:

Աղասի Կարապետյանը «Հետքի» հետ զրույցում ասաց, որ այս տարվա ապրիլի 3-ին Աջափնյակ եւ Դավթաշեն վարչական շրջանների ընդհանուր իրավասության դատարանից ստացել են վճարման կարգադրություն, ըստ որի` երկշաբաթյա ժամկետում դրա դեմ չառարկելու եւ ինքնակամ վճարում չկատարելու դեպքում նրա թոշակառու մայրիկից հարկադիր կարգով կբռնագանձվի 635 հազար դրամ:

Աղասին պատմեց, որ 2011թ. նոյեմբեր-դեկտեմբեր ամիսներին մոր առողջական վիճակը վատացել է եւ հանպատրաստի, շտապօգնության ավտոմեքենայով նրան հասցրել են Երեւանի Մխիթար Հերացու անվան պետական բժշկական համալսարանի թիվ 1 կլինիկական հիվանդանոց:

Բժիշկները պահանջել են վճարում կատարել, քանի որ անհապաղ պետք է կորոնոգրաֆիա եւ ստենդավորում արվեր: Աղասին պատմեց, որ այդ պահին չի կարողացել վճարում անել, իսկ այդ վիճակով չէր կարող մորը տուն տանել, ուստի խնդրել է իր ստորագրությունը տալ, որով պարտավորվում է հետագայում վճարել պահանջված գումարը: 

«Հիվանդանոցում համաձայնվեցին եւ կատարեցին ստենդավորում, ինչի համար շնորհակալ եմ նրանց: Հետագայում մի կերպ 400 հազար դրամը վճարեցի, մնացած 635 հազար դրամն առ այսօր չեմ կարողացել վճարել, եւ Երևանի Մխիթար Հերացու անվան պետական բժշկական համալսարանը արդեն դիմել է դատարան: Անելանելի վիճակ է, չգիտեմ ինչ անեմ: Խնդիրն այն է, որ ոչ թե ինձ են դատի տվել, թեեւ ես եմ ստորագրել, այլ 77-ամյա մորս են դատի տվել: Եթե ես ի վիճակի լինեի, կվճարեի ու չէի էլ թողնի բանը դատարանին հասներ»,-ասում է ազատամարտիկը:

Աղասի Կարապետյանը նշում է, որ այս վիճակին չէր հասնի իր ընտանիքը, եթե օրենք լիներ այն ազատամարտիկների համար, ովքեր վիրավորվել են, բայց փաստաթղթերով ամրագրված չէ այդ փաստը:

«Ինչի՞ համար ես պիտի իմ ծննդյան օրով նման քայլի դիմեմ, խնդրեմ, որ ինձ օգնեն: Թեկուզ ժողովրդին դիմելը ամոթ է, բայց այլ ճար չունեմ, ի՞նչ անեմ: Ես դիմում եմ կառավարությանը, թե կառավարություն ջան, այս վիճակն է, ես ի՞նչ անեմ: Տղաս էլ բանակում է` սահմանամերձ գոտում է ծառայում, ինչի համար ուրախ եմ, բայց հիմա ես ի՞նչ անեմ, դա չգիտեմ, որտեղի՞ց վճարեմ այդ գումարը»,-ավելացրեց Աղասի Կարապետյանը:

Նշենք, որ բանկում Աղասի Կարապետյանն ունի հաշվեհամար եւ ազատամարտիկին ու նրա մորն օգնելու համար քաղաքացիները կարող են փոխանցումներ կատարել:

Ստորեւ ներկայացնում ենք ՀՀ դրամով եւ արտարժույթով բացված հաշվեհամարները:

ՎՏԲ Հայաստան Բանկ

16044035470400 AMD

16044035470401 USD

16044035470402 EUR

16044035470403 RUB

Լուս.՝ Ա. Կարապետյանի ֆեյսբուքյան էջից